”శోధిని”

Sunday 30 March 2014

నవ వసంతం!

          

           చైత్ర  మాసంలో ప్రకృతి  ఏంతో  శోభాయమానంగా ఉంటుంది.  తక్కువ చలి, తక్కువ వేడి వున్న వాతావరణం ఎంతో  సుఖదాయంగా ఉంటుంది.  చెట్లు ఆకులు రాల్చి కొత్త చిగుళ్ళు చిగుర్చుటచే ఆకుపచ్చదనం కళ్ళకు ఆనందాన్ని కలుగచేస్తుంది.  వసంత ఋతువు చైత్రమాసంతోనే ఆరంభమవుతుంది.  ఈ రుతువురాగానే కోయిలలు లేత మామిడి చిగుళ్ళను తింటూ మధురంగా గానం చేస్తుంటాయి.  ప్రకృతిని  చూసి మనుషులే కాకుండా సకల ప్రాణులు పరవశం చెందేది ఈ రుతువులోనే!  వసంత ఋతువులో ప్రకృతి  సర్వాలంకార శోభితమై కనువిందు చేస్తుంది. చైత్ర మాసం తొలిరోజే ఉగాది.  తెలుగు వారికి నూతనసంవత్సర ప్రారంభ రోజు.  ఉగాది రోజున ఆనందంగా ఉంటే , సంవత్సరమంతా శాంతి, సౌఖ్యాలతో జీవితం గడిచిపోతుందని చాలా మంది నమ్ముతారు.   అందుకే ఉగాది రోజున ఉల్లాసంగా, ఉత్సాహంగా ఉండటానికి ప్రయత్నిస్తారు.  

       ఉగాది అనగానే ముందుగా గుర్తుకొచ్చేది ఉగాది పచ్చడి.  ఈ పచ్చడి వివిధ రుచులతో కూడిన అనుభూతిని కలిస్తుంది.  జీవితంలో ఒడిదుడుకులు, లాభనష్టాలు, తీపి గుర్తులు, చేదు  అనుభవాలతో సమతుల్యంగా ఉండాలనేదే దీని అంతరార్థం.  మామిడి పిందెలు, వేప పువ్వు, కొత్త బెల్లం, కొత్త చింతపండు, ఉప్పు, పచ్చి మిరపముక్కలతో చేసే పచ్చడిలో ఉండే ఆరు రుచులు జీవితంలోని సుఖనస్టాలకు  ప్రతీకలని చెబుతారు.  అయితే వేసవి ఆరంభంలో ఈ పచ్చడి తినడం వల్ల  శరీరంలో వాత, పిత్తం, కఫ, దోషాలేవైనా ఉంటే పోతాయంటుంది  వైద్యశాస్త్రం.  వేప పువ్వు క్రిమిసంహారిని. చర్మరోగనివారిణి. చింతపండు జీర్ణక్రియను మెరుగుపరుస్తుంది.  లేత మామిడికాయ ముక్కలు రక్తప్రసరణ దోషాలను నివారిస్తుంది.  పచ్చి మిరప చెవిపోటు, గొంతు వాపు వంటి వ్యాధులను అరికడుతుంది.  శారీరంలో కొవ్వును పెరగనీయకుండా చేసేది ఉప్పు, కొత్తబెల్లంలో ఐరెన్ సంవృద్దిగా లభిస్తుంది.  ఈ పచ్చడిని కేవలం ఉగాది రోజునే కాకుండా ఉగాది మొదలుకొని శ్రీరామనవమి వరకు తొమ్మిది రోజులు క్రమం తప్పకుండా తింటే, రుతుమార్పు వల్ల  వచ్చే అనేక సమస్యలను దూరం చేస్తుంది. ఉగాదిరోజున దేవాలయాలలో, నలుగురు కూర్చుని  మాట్లాడుకునే ప్రదేశాలలో పూజారి గారు కొత్త సంవత్సర పంచాంగానికి పూజచేసి, అందులోని విశేషాలను అందరికీ  చదివి వినిపించడం ఆనవాయితి.   నూతన సంవత్సర వెలుగుకి నాంది పలికే ఉగాదిని ఆహ్వానిస్తూ... శ్రీ జయనామ సంవత్సరానికి స్వాగతం పలుకుదాం!

            తెలుగు వారందరికీ ఉగాది పర్వదిన శుభాకాంక్షలు!

Friday 28 March 2014

గురువును మించిన శిష్యుడు!


ఆరోజు పంతులమ్మ-- పక్షుల గురించి పాఠం  చెబుతూ ...
" ప్రవీణ్ ...! నేను చెప్పిన పాఠం  అర్థమయిందా?"
" బాగా అర్థమయింది టీచర్"
"అయితే నిన్ను ఒక ప్రశ్న అడుగుతాను జవాబు చెప్పరా!"
"అడగండి టీచర్"
"గుడ్డులోంచి కోడిపిల్ల ఎలా బైటకు వస్తుంది? "
"గుడ్డులోకి కోడిపిల్ల ఎలా వెళ్ళిందో  మీరు చెప్పలేదు టీచర్?"
విద్యార్ధి అమాయకంగా  అడగడంతో అవాక్కవడం  పంతులమ్మ వంతయింది.

  

Tuesday 25 March 2014

మంచి నాయకులను ఎన్నుకోండి !

ప్రభుత్వ కార్యాలయాలలో పనిచేసే సిబ్బంది సమయానికి రారు... లేటుగా వచ్చినా సీట్లో కనిపించరు...ఒకవేళ కనిపించినా చేతులు తడవందే పని ప్రారంభించరు. ఇదీ మన రాష్ట్రప్రభుత్వ కార్యాలయాల పరిస్ధితి.  చివరికి ఆఫీసర్ సంతకం అయిన తర్వాత కూడా  స్టాంప్ వేయడానికి  చేతులు చాపుతున్నారంటే ముమ్మాటికి ఇది  మన పాలకుల వైఫల్యమే.  నందమూరి తారక రామారావు ముఖ్యమంత్రిగా ఉన్న సమయంలో ప్రభుత్వ ఉద్యోగులలో క్రమశిక్షణతో పాటు భయం కూడా ఉండేది.  ఉద్యోగి పోరపాటున కూడా చూయి చాపడానికి జంకేవాడు. కాని, నేడు తాము ప్రజల సేవకులమని మరచి దర్జాగా అవినీతికి పాల్పడుతున్నారు.  ఉద్యోగంలో కొత్తగా చేరుతున్న  యువకులు సైతం అదే బాటలో నడుస్తుంటే.. ఇక ఈ వ్యవస్థను కాపాడేదెవరు? అందుకే యువతీయువకుల్లారా  ఎన్నికల పైన దృష్టి పెట్టండి... ప్రజలల్లో విద్వేషాలను పెంచే నాయకుల భరతం పట్టండి.  ఓటు హక్కు వినియోగంలో అజాగ్రత్త వహిస్తే... ప్రజాస్వామ్యానికి చాలా ప్రమాదకరమని గుర్తించండి.  ప్రతి ఇంటిలోనూ, ప్రతి గ్రామం లోనూ ఓటు విలువను గురించి ప్రజలకు తెలియజేసే భాద్యతను తీసుకోండి.  కులం, మతం, ప్రాంతం, పార్టీలను చూడకుండా మంచి వ్యక్తులకు ఓటు వేయించేవిధంగా  కృషి చేయండి.  మోసగాళ్ళ ఉచ్చులో చిక్కుకున్న ప్రజలలో రాజకీయ చైతన్యం తీసుకురండి.  ప్రజలలో మార్పు వచ్చినప్పుడే మంచి నాయకులు ఎన్నుకోబడతారు.  మంచిపాలనను చూడగలుగుతాం. 

Thursday 20 March 2014

దాచావంటే... దాగదులే !

 

 

విలేఖరి       : "మీరు ఏదీ దాచుకోకుండా నటిస్తారని

                       ప్రేక్షకుల వాదన... మీరేమంటారు ?"

హీరోయిన్  :  "వాళ్ళ వాదన తప్పంటాను !"

విలేఖరి      :  "ఎలా చెప్పగలుగుతున్నారు?"

హీరోయిన్  :  "ఇప్పటి వరకు నా వయసెంతో ఎవ్వరికీ

                     తెలియకుండా దాచాను ... ఇది చాలదా     

                     నేనెంత దాస్తున్నానో ...!"

                 

విలేఖరి     : ఆ (... !

Saturday 15 March 2014

సరదాల రంగుల హోలీ...!


పిల్లలు, పెద్దలు రంగులు చల్లుకుంటూ  ఆనందోత్సాలతో... ఆహ్లాదంగా జరుపుకునే సరదా పండుగ హోలి.  వసంత వేల ప్రకృతిలోని అనేక రంగుల పూలతో మమేకమయ్యే రోజు హోలి పూర్ణమి.  సంప్రదాయ బద్దమైన రంగుల పండుగ కాబట్టి  రంగు వచ్చే రకరకాల పూలతో, ముఖ్యంగా మోదుగ పూలతో తయారు చేసుకున్న రంగులతోనే హోలి జరుపుకోవడం ఉత్తమం.  కృత్రిమ రసాయనిక రంగులు వాడి చర్మ వ్యాధులు తెచ్చుకోవడం మూర్ఖత్వం.  అంతేకాదు రసాయనిక రంగులు వాడటం వలన కంటి చూపు పోయే ప్రమాదం కూడా ఉందని మరచిపోవద్దు.  రంగులు చల్లుకోవడంలో జాగ్రత్తలు తీసుకుంటూ,  సున్నితమైన రంగులతో సరదాగా కాసేపు ఆడుకుని, ఆవెంటనే వంటికి అంటిన రంగుల్ని తొలగించుకోండి.  ఇలా తగు జాగ్రత్తలు తీసుకుంటూ హోలి పండుగను ఆనందంగా జరుపుకోండి.

                        అందరికీ హోలీ శుభాకాంక్షలు!

Thursday 13 March 2014

పనిమనిషి ---- యజమానురాలు !

యజమానురాలు : "నేను ఇచ్చిన చీరలు కట్టుకుని పనిలోకి రావద్దు...  తెల్సిందా?"
పని మనిషి : "అదేంటి అమ్మ గారు... అలా అనేశారు!"
యజమానురాలు : "అదికాదే పిచ్చి మొద్దు... మా వారిది వట్టి  వంకరబుద్ధి.  కావాలనే నిన్ను కౌగలించుకొని,'మీ అమ్మగారు అనుకున్నాను'  అంటాడు" అసలు విషయం చెప్పింది.


Sunday 9 March 2014

మన తెలుగువాడు !


పక్కవాడి ఎదుగుదలను 
జీర్ణించు కోలేనివాడు 
తన మాటే వినాలనే 
అహంభావం కలవాడు 
ఏదోవిధంగా ఎదుటివారిని 
అవమానించడానికో... 
భాదించడానికో... 
నిరంతరం ప్రయత్నించేవాడు 
వాడే ... మన తెలుగువాడు!
 

Friday 7 March 2014

అంతర్జాతీయ మహిళా దినోత్సవం !



'స్త్రీ' అంటే ఓర్పు, సహనం, ప్రేమ, అణకువ, ఆప్యాయత, త్యాగం, అనురాగం.  తల్లి గర్భంలో ఉన్నప్పటినుంచి జీవితయాత్ర ముగిసే వరకు ఎన్ని కష్టాలు  ఎదుర్కొన్నా...  తన పైనే ఆధారపడి జీవిస్తున్న  పురుషుడిని కంటికి రెప్పలా కాపాడుకుంటూ రావడం నిజంగా పురుషుల అదృష్టం.  అందుకే ఆమెను త్యాగమూర్తి అన్నారు.  ప్రకృతి స్వరూపిణి అయిన  స్త్రీకి కష్టం కలిగించినవాడు బ్రతికి బట్ట కట్టలేదు.  దాని పర్యావసారం చాలా తీవ్రంగా ఉంటుంది.  ఏ  గృహంలో స్త్రీ కన్నీరు పెడుతుందో అక్కడ సిరిసంపదలు తొలగిపొతాయి. ఎక్కడయితే స్త్రీలు గౌరవింపబడతారో అక్కడ దేవతలు కొలువయి ఉంటారు.  అంతర్జాతీయ మహిళా దినోత్సవం సందర్భంగా మహిళలు అన్ని రంగాలలో పురుషులకు ధీటుగా సమైక్య శక్తులుగా, సాహస మూర్తులుగా ఉద్యమించాలని కోరుకుంటూ...

అందరికీ మహిళా దినోత్సవ శుభాకాంక్షలు!

రూప లావణ్యం!



గులాబీ రెమ్మ 
వెన్నెల కొమ్మ 
మల్లెల మకరందం 
సంపెంగ మనోహరం 
విరజాజి సౌకుమార్యం 
అనురాగ  పరిమళం 
అపురూప లావణ్యం 
ఆప్యాయత సుగంధం  
కలబోసిన సోయగం 
నీ మేని సౌందర్యం !
అందుకే... 
గుండె గుడిలో నీ రూపం 
మనసు నిండా నీ ధ్యానం