ఆనంద నిలయంలో కొలువై ఉండి, భక్తులను తనవద్దకు రప్పించుకునే దేవదేవుడు శ్రీ వేంకటేశ్వరుడు. కోరిన వరాలిచ్చే కోనేటి రాయని మొక్కు తీర్చుకునేందుకు రోజూ తిరుమలకు వేలసంఖ్యలో భక్తులు వెల్లువెత్తుతారు. వైకుంఠం ఎలా ఉంటుందో మనం చూడలేదు కాని, తిరుమలలో అడుగు పెట్టగానే నిజమైన వైకుంఠం మనకళ్ల ముందు ప్రత్యక్షమవుతుంది. స్వామివారిని కనులారా తిలకించి, భక్తిపారవశ్యంతో పునీతులవుతారు. తిరుమలేశుని విగ్రహం విష్ణురూపమే అయినా విభిన్న దేవతాచిహ్నాలు కలిగిన దివ్యమనోహర విగ్రహం. అంటే, ముక్కోటి దేవతలు స్వామియందే ఉన్నారని అర్థం.
