నోరు మంచిదయితే ఊరు మంచిదవుతుందనే సామెత ఉంది. మనం స్నేహ పూర్వకంగా మాట్లాడితే పగవాడు కూడా మనవాడవుతాడు. మన ఆలోచన, గుణగణాలు మన మాటల్లో ప్రతిబింబిస్తాయి. కాబట్టి మాట్లాడటానికి ముందు ఒకసారి ఆలోచిస్తే బాగుంటుంది. ఎవరితో ఎలా మాట్లాడాలో తెలుసుకోవడం ప్రతి వ్యక్తికీ అవసరం. పెద్దవాళ్ళతో, ప్రముఖులతో, స్నేహితులతో, ఇరుగు పొరుగు వారితో ఎవరికీ తగిన విధంగా వారి దగ్గర మాట్లాటంలో మన తెలివి, మంచితనం, చాతుర్యం బయటపడతాయి. కొంత మంది నోటి దురుసు వల్ల అప్పుడప్పుడూ తగాదాల వరకూ వెళుతుంటారు. అలాంటివారికి ఎంత దూరంగా వుంటే అంత మంచిది. మన మాట తీరు మన జీవితాన్ని పూలబాట చేయగలదు. అదేవిధంగా ముళ్ళబాటగానూ చేయగలదు. అందుకే మనం మాట్లాడేటప్పుడు తగు జాగ్రత్తలు తెసుకోవడం ఎంతయినా అవసరం.
